Um myndina

Hér er á ferð grípandi og ljóðrænn leiðangur um sambandið milli huga, líkama og hljóða og myndrænt ferðalag um landamæri tjáskipta. Wolfgang Fasser er blindur tón- og hljóðlistarmaður sem vinnur með alvarlega fötluðum  börnum. Á leið sinni inn í myrkrið uppgötvaði Fasser heim hljóðsins; veröld samsíða hinum sýnilega heimi. Víðtækar rannsóknir hans á áhrifum hljóðs á huga og líkama vísuðu honum leiðina að tónlistarmeðferð. Í dag býr þessi Svisslendingur í fallegum dal nálægt Flórens á Ítalíu. Flestir skjólstæðinga hans búa við fjölfötlun, sumir eru blindir, aðrir mállausir, enn aðrir virðast ekki hafa nein tengsl við umheiminn. Skref fyrir skref, með notkun alls konar tóna og hljóða, myndar Fasser samtal við börnin og bætir hæfni þeirra til tjáningar og skynjunar á stórkostlegan hátt.