Um myndina

Árið er 1978 og hinn fjórtán ára gamli Nikolas lifir í vellystingum ásamt yngri bróður sínum og róttækum hippaforeldrum, Magnúsi og Lone. Þegar Lone deyr í bílslysi sekkur Magnús í þunglyndi. Nikolas veit ekki hvert hann á að snúa sér þar til besti vinur hans setur nýjustu skífuna á fóninn: Never Mind the Bollocks með Sex Pistols. Fyrr en varir hefur Nikolas fundið ný not fyrir öryggisnælur heimilisins og fest kaup á gítar. Grínið hefst fyrir alvöru þegar Magnús nær sér skyndilega á strik. Í stað þess að herða drenginn sinn, hvetur hann hann áfram. Það er alltaf snúið að vera í uppreisn, en enn erfiðara þegar pabbi þinn er að hlusta á sömu plötur og þú! Synir Noregs er lífleg, skemmtileg og margslungin kvikmynd sem á heima í flokki með bestu uppvaxtarsögum Norðurlanda.